Planong ng  Philippine Golf Tour na mag-organisa ng gaya ng  isang “Bubble Type” tournament sa taong 2021 sa iba’t ibang lugar sa Luzon na hangad na maipagpatuloy ang paglalaro na nakadisenyo sa health and safety standards at protocols ng pamahalaan.

 

Ayon kay Games and Amusement Board consultant sa larong Golf na si Oliver Gan sa TOPS, Usapang Sports On Air,  nagpalabas ng mungkahi ang Philippine Golf group na magkaroon ng mala-NBA type na klase ng torneo na ilalagay sa isang Hotel. Dito mananatili ang mga golfer na dadaan sa masusing Reverse Transcription Polymerase Chain Reaction (RT-PCR) test or swab testing at iba pang mga health at safety standards na inilatag ng Inter-Agency Task Force for Emerging Infectious Disease (IATF-EID) at Department of Health.

 

Sinabi rin ng dating Philippine Sports Commission (PSC) sports coordinator na susunduin ang mga ito ng pribadong transportasyon para ihatid sa mga designated golf courses, kung saan napipisil na pagganapan nito ang Summit Point Golf and Country Club sa Lipa, Batangas, Beverley Place Golf Club sa Mexico, Pampanga at iba pang mga golf courses, partikular sa mga lugar lang Luzon.

 

 Aabot umano sa 80 pro-golfers sa buong bansa ang lalahok sa anim na iba’t ibang torneo, kung saan nakikinita ng mga organidador na magiging magastos ang naturang palaro para sa mga nais lumahok dahil maaaring umabot sa P20,000.00 kada buwan ang gugugulin ng isang pro-golfer.  

 

“This are all under their proposal, pero lahat ng ito ay pinag-aaralan dahil sa magiging malaki ang gastusin ng ating mga pro-golfers, lalo na kung hindi maganda ang laro ng isang player tapos mag-risk siya magbayad ng P20,000 ay talagang mabigat,” wika ni Gan, na sinabing maglalaan ng halaga ang mga manlalaro sa pambayad sa kanilang Hotel at akomodasyon, transportation, swab testing at iba pang safety protocols na kanilang ilalatag para sa kaligtasan ng lahat ng manlalaro sa banta ng pandemya.(LP/TOPS)