HINDI lamang ang nagawa sa gitna ng paglaban sa pandemic bagkus ang magagawa pa ng pamunuan ng Games and Amusements Board (GAB) ang mga isyu na prioridad na bibigyan ng malalim na talakayan sa gaganaping 3rd Professional Sports Summit via Zoom sa Setyembre 29.

Ayon kay GAB Chairman ‘Abraham’ Baham Mitra mistulang SONA ng kanyang administrasyon ang ikatlong edisyon ng Summit, ngunit hindi lamang ang mga nakamit sa nakalipas na limang taon, bagkus ang mga nais pang isulong na programa tulad ng Livelihood Program sa mga atleta at Pensyon sa mga nagretirong boxers ang mga isyung nararapat na mabigyan nang agarang solosyun.

“Marami tayong nagawa at naisakatuparan para sa atletang Pinoy at sa professional sports. Sa pagtutulungan po ng ating Board at Division head, nakaagapay tayo sa gitna ng pandemic,” pahayag ni Mitra sa kanyang pagbisita kahapon sa ‘Usapang Sports’ via Zoom ng Tabloids Organization in Philippine Sports (TOPS).

“Kasama na sa plano namin yang livelihood para sa ating mga atleta at pension sa mga retired boxers. Sa ngayon po kasi wala tayo nyan, hindi pa kaya ng budget ng GAB. Hopefully, next year. Sabi ko nga po, we don’t need a boxing commission, idagdag nyo na lang sa GAB yung pondo, mas marami tayong magagawa,” aniya.

“We invited resource speakers from the Senate, sa House para mabigyan tayo ng kaalaman sa mga batas na makatutulong sa ating mga atleta at sa sports. Andyan din ang mga representive from established league like PBA, 3x3, women’s basketball, NCAA and UAAP. Our friends in boxing community and other sports mapagkukunan din natin in impormasyon, so yung mga nagbabalak mag-organized or magpromote ng boxing and other sports may ideya sila sa ‘bubble set-up’,” ayon sa dating Palawan Governor at Congressman.