by Marlon Bernardino
MANILA, Philippines---Naka-ahon ang Defending Champion Laguna Heroes na galing sa pagkatalo sa  Negros Kingsmen matapos payukuin ang Palawan's Queen's Gambit, 13-8, sa Professional Chess Association of the Philippines (PCAP) na tinampukang Grandmaster Wesley So Cup online tournament Sabado, Hunyo 12, 2021.

Giniba ni Fide Master Austin Jacob Literatus kontra si Woman Fide Master Shania Mae Mendoza para ihatid ang Heroes sa 11-4 win-loss record sa Northern Division.
Si Literatus na dating top player ng National University chess team ay winasiwas si Mendoza sa 42 moves ng Neo Gruenfeld defense sa kanilang blitz duel na sinundan din ng 66 moves win ng Alekhine defense sa rapid play.
Kasama din sa nagtulak ng importanteng panalo sa Heroes ay sina Fide Master Jose Efren Bagamasbad at Vince Angelo Medina.
Pinayuko ni Bagamasbad si Woman National Master Carmelita Abanes sa 47 moves ng Ruy Lopez Opening, Berlin defense sa blitz portion kasunod ng 35-move victory ng kanilang Sicilian skirmish sa rapid play.
Sa panig ni Medina ay pinatoab niya si Woman International Master Catherine Perena-Secopito sa  57 moves ng Queen's Pawn Opening, Levitsky Attack sa kanilang blitz match ups kasunod din ng 48 moves triumph ng kanilang Queen's Gambit Declined clash sa rapid format.
Suportado ng Greatech Philippines, Inc., SDC Global Choice, Jolly Smile Dental Clinic, KALARO at ng Rotary Club of Nuvali, ang Laguna’s AGM Dr. Alfredo Paez at squad ay nagwagi ng six out of the seven boards sa  Blitz category.
Habang sa Rapid category ay 7-7 all deadlock.
"We are just trying to get better every game. We are just trying to get in better shape," sabi ni Dr.Fred Paez, isa sa apat na co-team owner ng Laguna Heroes na kinabibilangan nina Mr. David Nithyananthan ng KALARO, Engr. Benjamin Dy ng SDC Global Choice at Engr. Jonathan Mamaril ng Oregon.
Sa iba pang kaganapan, panalo si Grandmaster Rogelio "Banjo" Barcenilla Jr. kontra kay sub-import Indian International Master at Woman Grandmaster Rout Padmini sa kanilang blitz encounter na sinundan naman ng pagkatalo sa rapid game.
Namayani din si Woman National Master Jean Karen Enriquez kay Woman International Master Beverly Mendoza (blitz) subalit nadapa kay Woman International Master Marie Antoinette San Diego (rapid), habang pinisak ni Grandmaster John Paul Gomez si Woman International Master Mikee Charlene Suede (blitz) kasunod ng hatian ng puntos kay Marife Dela Torre (rapid).
Nagtamo naman si Candidate Master Arjie Bayangat ng double black eye na natalo kina San Diego (blitz) at Suede (rapid).
Sa PCAP GM Wesley So Cup, ang champion team ay magbubulsa ng P150, 000 habang ang runner-up ay tatangap ng P75,000. Habang maibubulsa ng third placer ang P40,000, at nakalaan sa fourth placer ang P20,000.-Marlon Bernardino-
Makikita sa larawan si Grandmaster Rogelio "Banjo" Barcenilla Jr. na panalo kay sub-import Indian International Master and Woman Grandmaster Rout Padmini sa kanilang blitz encounter subalit natalo sa rapid game.