Gumawa ng bagong regulasyon ang lokal na pamahalaan ng Muntinlupa City matapos amyendahan ang liquor ban para sa pagbebenta at konsumpsyon ng inuming nakalalasing (alcohol beverages) sa panahon ng general community quarantine (GCQ).
Inaprubahan ni Mayor Jaime Fresnedi ang City Ordinance 2020-119 na nagpapahintulot sa pagbebenta at pagkunsumo ng alak sa mga pangnegosyong istablisimyento na may basbas ng Inter Agency Task Force (IATF) at iba pang nagpapatupad na mga awtoridad sa panahon ng GCQ.
Nauna rito ipinatupad ng lokal na gobyerno ang liquor ban sa lahat ng level sa community quarantine.
Sa ilalim ng bagong ordinansa, ang pag inom ng alak ay tanging pinapayagan lamang sa kanilang pribadong mga tahanan sa mga konsyumer. Ang social drinking sa mga indibidwal sa kaparehong residente ay nanatiling bawal.
Samantala, ang pagkunsumo ng mga alcoholic beverage sa pampublikong lugar gaya ng restaurants, resto-bars at iba pang commercial establishments ay kailangang regulated — pinakamarami na ang dalawang botelya para sa serbesa at dalawang baso para sa hard drinks, wine at whiskey.
Ang mga lalabag ay magmumulta ng P500 para sa unang offense, P1,000 sa ikalawang offense at P2,000 sa mga susunod na opensa.
Ang mga lalabag na mga menor de edad ay bibigyan ng matinding babala para sa first offense, withdrawal ng scholarship grants buhat sa local government o multa P500 para sa non-grantees sa second offense at P1,000 para sa mga susunpd na opensa, na ang multa ay sasagutin ng kanilang magulang o guardians.
Ang mga lalabag na mga business entities ay papatawan ng multang P5,000 at pagsasara, suspension o pagbawi ng business license at pagkakakulong ng isang taon. (LP/MT)