ni Marlon Bernardino
MANILA---Sisikapin ni Grandmaster Rogelio "Joey" Antonio Jr. na muling magpakitang gilas sa pagtulak ng 200-player field GM Rosendo Carreon Balinas Jr. Open Rapid Chess Tournament sa Sabado, Setyembre 30, 2023, 8:30am sa 2nd floor Open Kitchen Foodhall, Rockwell Business Center, Sheridan Street, Mandaluyong City.
Layunin ng 13-time Philippine Open Champion na si Antonio ang panibagong korona sa 7-round tournament na itinataguyod ng GM Balinas family, na suportado ng Open Kitchen Foodhall, Rising Chess Unlimited at National Chess Federation of the Philippines Director Engr. Rey Urbiztondo na nakataya sa magkakampeon na nagkakahalaga ng P10,000.
Ang 1-araw, 10 minuto at 5 segundong increment rapid time control format ay ginanap bilang parangal sa ika-82 Kaarawan at ika-25 Anibersaryo ng Kamatayan ni GM Rosendo Carreon Balinas Jr. na pinakamahusay na naaalala sa pagkapanalo sa 1976 Odessa International.
“I hope to do well in this event and gain some elo rating points,” ani Antonio, isa sa estudyante ng GM Balinas na sariwa pa sa runner-up finish sa katatapos lang na JMN Internet Installation Services Open Rapid Chess Tournament sa Nepo Farm sa Tarlac City noong Setyembre 24, 2023.
“It will be a tough 7 rounds rapid tournament,” dagdag pa ni Antonio, na nagkampeon sa Iligan Diyandi Festival Individual Open Rapid Chess Tournament noong Setyembre 15, 2023 na ginanap sa Robinsons Place Atrium sa Iligan City.
Isa rin si International Master Daniel Quizon sa mga dapat abangan kasama sina IM Michael Concio Jr., IM Angelo Abundo Young, IM Rolando Nolte, IM Barlo Nadera at IM Ronald Bancod.
Kalahok din sa labanan ang 2020 IPCA (ang International physically disabled chess association) Champion FM Sander Severino maging sina FM David Elorta, FM Mark Jay Bacojo, FM Carlos Edgardo Garma, FM Noel dela Cruz, FM Adrian Ros Pacis, Woman National Master Antonella Berthe Racasa , sinabi ni Atty. Rodolfo Enrique "Rudy" Rivera at bagong chess sensation na si Joel Delfin.
Si General Trias City Chess Club President Ederwin Estavillo, isang bahagi ng coaching staff ng PH chess team ngayong taon para sa FIDE World Youth Chess Championships sa Montesilvano, Italy ngayong Nobyembre, ay nagpadala ng kanyang 40 estudyante para lumahok sa chess event na ito.-Marlon Bernardino -