by Marlon Bernardino
MANILA---Napanatili ni Grandmaster Rogelio "Joey" Antonio Jr. (Elo 2397) ang pagsalo sa liderato sa Open 50+ maging si International Master elect at Fide Master Jose Efren Bagamasbad (Elo 2051) ay nasa tuktok ng unahang puwesto sa Open 65+ matapos ang second rounds ng 30th FIDE World Senior Individual Chess Championship na ginanap sa Hotel Cenacolo sa Assisi, Umbria, Italy Miyerkoles ng gabi.

Tangan ang itim na piyesa, namayani ang 13-time Philippine Open champion Antonio kay Slovakia's Fide Master Milan Kolesar (Elo 2136) sa 80 moves ng Reti Opening game tungo sa total 2 points.

"Last man standing kami. Huling natapos," paliwanag ni Antonio sa kanyang 2nd game.
Kasama ni Antonio sa crowded leaderboard ay sina GM Zurab Sturua ng Georgia, GM Ivan Morovic Fernandez ng Chile, GM Frank Holzke at GM Klaus Bischoff ng Germany, GM Milos Pavlovic ng Serbia, GM Darcy Lima ng Brazil, GM Maxim Novik ng Lithuania, GM Eric Prie ng France at 15 pang mga manlalaro.
Si Antonio na suportado ang kanyang kampanya ng National Chess Federation of the Philippines, Philippine Sports Commission, Philippine Olympic Committee,  Philippine Amusement and Gaming Corporation , Sen. Bong Go, Col. Jaime Osit Santos at Bayanihan Chess Club Co-Founding Chairman Dr. Joe Balinas ay makakalaban si Iraq's International Master Hussein Ali Hussein Al-Ali (Elo 2231) sa third round Huwebes ng gabi.
Winasiwas ni Al-Ali si Fide Master Dale R. Haessel (Elo 2066) ng Canada sa second round.

Nakabalik sa kontensiyon si International Master Angelo Abundo Young (Elo 2309) matapos ang opening sorry loss ng payukuin si Spain's Marco Di Paolo (Elo 1833) sa 25 moves ng Pribyl defense tangan ang black pieces.
"Sayang first game ko pero sabi ko sa sarili ko bawi na lang at nanalo naman sa 2nd round," sabi ni Young, ang eight-time Illinois USA champion.
Makatatapat ni Young si Italian Fide Master Giuseppe Fabiano (Elo 2055) na binigo si Hans Steyn (Elo 1824) ng Republic of South Africa.
Yumanig ang second round sa 65 over category matapos ang 66th seed Bagamasbad (Elo 2051) ay sinorpresa ang 8th seed Grandmaster Jens Kristiansen (Elo 2353) ng Denmark.
Si Bagamasbad na suportado ng UST Engineering Alumni Association, Philippine Amusement and Gaming Corporation at Wilcon Depo Founder/Chairman Emeritus Mr. William Belo ay namayani sa 26 moves ng Hybrid Queens Indian Dutch tangan ang black pieces.
"I usually focus on one game at a time." sabi ni Bagamasbad na sariwa pa sa kampeonato ng Asian Seniors Chess Championship sa Over 65 category division nitong Okt. 14-22 sa Auckland, New Zealand.
Sa kanyang tagumpay ay nakamit ni Bagamasbad ang outright International Master at Grandmaster norms.

Makakalaro ni Bagamasbad si Grandmaster Nona Gaprindashvili (Elo 2268) ng Georgia na dumaig kay Brian W R Hewson  (Elo 2028) ng England.
Si Gaprindashvili ay dating Soviet at Georgian chess player, ang first woman na na award ng FIDE title Grandmaster noong 1978. Siya ang fifth women's world chess champion (1962–1978).

Ang 60 year old Antonio ang top player ng PCAP's Iloilo Kisela Knights na pag-aari ni sportsman Mr. Leo Sotaridona ay target na malagpasan ang runner-up finish sa 27th World Senior Chess Championship 2017 (50+) sa Acqui Terme, Italy noong 2017.
Ang 59 year old Young,  senior player ng PCAP's Laguna Heroes na pag-aari ni Dr. Fred Paez ay target na makakuha ng GM norms matapos mag over-all 8th all finish sa 2019 edition sa Bucharest, Romania.

Habang ang 66 year old Bagamasbad na isa pang senior player ng Laguna Heroes ay nakatutok sa kanyang second GM norms.
Ang triumvirate ay nagpapasalamat kina NCFP Chairman/President Rep. Prospero "Butch" Arreza Pichay Jr. at NCFP CEO GM Jayson O. Gonzales sa kanilang suporta sa kampanya saEuropa maging kay POC President Mayor Abraham "Bambol" Tolentino Jr. na tumulong makakuha ng kanilang schengen visa.
Sina Sportswriter/Radio commentator National Master Almario Marlon Quiroz Bernardino Jr. at Roberto M. Racasa ang nagsisilbing coaches, trainers at second ng triumvirate.-Marlon Bernardino-