Ni Daniel Quindao Guden
Maple Grove City, Minnesota - DUHA ka mga NBA players ang gipili-an si Jimmy Butler o si D'Angelo Russell, kini ang gitutokan karon pag-ayo ni Tom "Thibs" Thibodeau ang bag-ong head coach ug president sa Basketball Operations sa Minnesota Timberwolves.
Sa ni-aging semana nagbansiwag sa mga Mantalaan sa Minnesota State ug Online news ang taho nga si Chicago Bulls guard/forward Butler ang gitinguha sa Timberwolves management nga mahitapo sa Land of Ten Thousand Lakes Minnesota team bugti sa no. 5 overall pick sa rookie drafting sunod semana.
Apan giyam-iran sa Bulls management ang plano sa Timberwolves sanglit si Butler ang ilang pambato ug ang go-to-guy sa nahisgutang kuponan. Matod sa tinubdan wala mag-apas ang Chicago team sa number 5 rookie pick apan maoy ilang gi demand si Andrew Wiggins ang Rookie Of the Year last year nga ibaylo kang Butler.
Ang Timberwolves way plano nga buhi-an sa team ang ilang nabingwit nga kanhi no. 1 pick nga produkto sa Kansas University ug Canadian born Wiggins, via trade ni Kevin Love gikan sa Cleveland Cavaliers.
Apan ning semanaha nitumaw ang laing balita nga posibleng si point guard D'Angelo Russell sa Los Angeles Lakers mahitapo sa Timberwolves bugti sa no. 5 pick.
Apan ang nahisgutang taho wala gidakop, gani pabiling tak-om ang Timberwolves management sanglit gipunting nila ang offensive ug defensive specialist ug Bulls veteran nga si Butler.
Apan ni-amag ang hungihong kabahin ni Russell niadtong Huwebes nga mahipunta gyud kini sa Wolves sanglit nagkuyog sila ni Timberwolves center ug 2015-16 Rookie of the Year Karl-Anthony Towns sa private airplane ngadto sa Cleveland City, Ohio pag tan-aw sa Game 6 tali sa Cavaliers ug Golden State Warriors diin nidaug ang nahauna.
Nasayran nga si Towns ang produkto sa Kentucky University maoy no.1 overall pick karon nga season nga gikuha sa Wolves. Samtang si Russell maoy number 2 overall pick nga nahipunta sa Lakers.
Managlahi man nga eskwelahan ang gigikanan sa duruha apan matod pa suod nga managhigala outside of the court si Towns ug Russell. So ning maong senaryo kinsa gyud kaha ang bag-ong mahisakop sa Wolves si Butler o si Russell?
Sa akong kwenta-kwenta mas mohaom si Butler sa Wolves tungod kay si Thibodeau kanhi coach sa Bulls ug iyang player si Butler pipila ka tuig busa suheto na siya sa dinuwaan niini.
Sa habig ni Russell nga usa ka rookie player wa pay nakitang maayo nga labok si Thibodeau kaniya. Gawas pa ni-ana gihulagway nga bata-bataon ug nakontrobersyal karon nga season si Russell dihang gikuhaan niya'g video tape ang iyang teammate Nick Young ug ang hinigugma niini bisan sa ilang pribado nga kalihukan.
Matubag ang mga pangutana sunod semana kung ang Rookie drafting 2016 humana.
Akong gidayeg ug congratulations to Hannah Rhea Sajulga ang bugtong anak babaye sa atong higala ang magti-ayong Ray ug Ponciana "Iana" Sajulga sa pagtapos sa Sekondarya. Sa ni-aging semana gipahigayon ang Graduation party sa ilang panimalay sa Chaska City, Minnesota.
Si Hannah maoy gitung-an sa tulo ka suod ug disiplinado nga managsuon. Sayod ko nga taas ang padulngan niining Hannah ug ang duha ka igsuon nga lalake.
Saludo ko ning ilang amahan nga taga Bukidnon via Bohol si Ray Sajulga grabe ka kugihan. Gawas nga gradwado sa Airline Mechanic Degree sa Philippine Air Force College of Aeronautics (PAFCA) Cebu. Nag trabaho kini isip inspector sa Delta Airlines - Minneapolis St. Paul Airport ug may laing mga trabaho pa.
Samtang ang kapikas ni Ray nga si Iana, usa ka nurse sa Minnesota ug kababayan ni Boxing Promoter ug incoming Department of Agriculture Secretary Manny Piňol sa Kidapawan, North Cotabato. (This email address is being protected from spambots. You need JavaScript enabled to view it.)