Matapos umiskor ng impresibong panalo si 32-year-old Mancunian Amir Khan kontra Billy Dib sa Saudi Arabia nitong Biyernes, agad na hinamon si Pambansang Kamao Manny Pacquiao, kung saan matagal na taon na niyang pinapangarap na makasagupa sa ibabaw ng ring.

Nagtala si Khan ng fourth-round TKO win kay Dib sa Jeddah, nang ang korner ng kanyang kalaban ay naghagis na ng tuwalya hudyat ng pagsuko.

Ang salpukan ay tinawag na kalokohan na hindi dapat nangyari. Ang laban ay itinakda sa welterweight, ang kamadong timbang ni Khan samantalang si Dib ay former featherweight world champion at huling sumabak sa super featherweight. Ibig sabihin tatlong buong weight classes ang kanyang nilagpasan sa laban.

Suwabe ang bilis ng kamay ni Khan at kumpiyansa sa kanyang mga atake dahil alam niyang hindi siya gaanong masasaktan sa bulinggit na si Dib.

Ang natural na timbang ni Khan ay 17 pounds ang higit na laki kaysa kay Dib. Kung kaya't hindi gaanong dapat ipagbunyi o ipagyabang ang panalo ni Khan.

Maaalalang si Pacquiao at Khan ay nagkataong sabay na nag ensayo kung saan pareho silang nasa stable ni Hall of Fame trainer Freddie Roach. Gayunman, atat pa rin makasagupa ni Khan si Pacquiao.

Kasalukuyang abala naman si Pacquiao at pokus sa kanyang magiging laban sa Linggo (July 21 sa Pinas) kay American undefeated champion Keith " One Time" Thurman sa MGM Grand Arena sa Las Vegas.(Louis Pangilinan)