MANILA - SA gitna ng COVID-19 pandemic, tuloy pa rin ang iligal na gawain ng mga bookies sa ilang lugar sa Kamaynilaan. Ngunit, hindi nagpapabaya ang Games and Amusements Board (GAB).

 

Sa pakikipagtulungan at tamang koordinasyon sa mga tauhan ng Manila Police District (MPD) Station 4, nasakote ng Anti-Illegal Gambling Unit ng GAB, sa pamumuno nina Chairman Abraham ‘Baham’ Mitra at Commissioners Mar Masanguid at Ed Trinidad ang anim na mananaya sa isinagawang pagsalakay sa illegal bookies nitong Oktubre 18 sa Maria Clara Street, Sampaloc, Manila.

 

Ito ang ikatlong pagkakataon na sinalakay ang naturang bookies na nagtatago bilang playstation. 

 

“Kahit ano pang pagpapanggap ang gawin nila, masasakote namin sila dahil masugid ang aming programa para matigil ang ganitong uri ng trabaho na kumikitil sa buwis ng ating pamahalaan na nagagamit sana sa tama higit at nasa krisis tayo dahil sa COVID-19 pandemic,” pahayag ni Mitra.

 

Iginiit ni Mitra na pinaigting ng GAB ang koordinasyon hindi lamang sa kapulisan bagkus sa komunidad upang madaling matukoy ang mga aktibidad at operasyon ng illegal bookies sa horceracing, sabong at iba pang mga laro.

 

Kinumpiska ng MPD ang lahat ng nasamsam na kagamitan na ginagamit sa bookie, habang inihahanda ang kaukulang kaso laban sa mga nahuling indibidwal sa naturang iligal na sugal.(LP/GAB)