TIMOG , QC – Ayos lang sa mga siklista ng Kyusi ang pagsuspendi ng lokal na pamahalaan ng siyudad sa ordinansang kailangang magsuot ng helmet o kung hindi ay papatawan ng multa.
Sa halip ani Mayor Joy Belmonte ay prayoridad nila ang pamamahagi ng libreng helmets.
“Salamat po sa pag unawa, hindi nman po ksi lahat nbibigyan ng helmet at hirap din po nkabili yung iba dahil sakto lang ang kinikita para sa pamilya," ani Antonio Castro sa kanyang post sa QC government Facebook page.
Sa post ng QC government noong Huwebes, una nilang ipaprayoridad ang paghahatag ng libreng bicycle helmets sa mga biker sa siyudad bago pinal nilang ipatupad ang ordinansa.
Ang Ordinance No. SP-2942 ay nagmamando sa mga bicycle rider na bumabagtas sa QC na gumamit ng safety headgear.
“Ipinagpaliban ng Quezon City Government ang pagmumulta sa mga bikers na walang helmet sa lungsod mula October 15. Patuloy munang mamimigay ang QC Department of Public Order and Safety (DPOS) ng libreng bike helmets sa ating QCitizens. Ang pagpataw ng multa ay magsisimula sa October 31," sa post ng pamahalaang lungsod.
Bahagi ito, ani Belmonte ng siyudad sa pag-asiste ng pamahalaan sa mga walang kakayahang makabili ang mga sarili ng kanilang helmet.
Dagdag pa niya, ang ekstrang dalawang linggong palugit ay makapagbibigay ng pagkakataon sa mga rider na sumunod sa ordinansa.
“Salamat sa pagtatama. Pero sana bawasan o walain yung penalty. Ang lubos kc na tatamaan ay ang ordinaryong manggagawa na siyang bumubuhay ng lugmok na ekonomiya, " sabi ni Hua Qin sa kanyang post.
Inisyal na namahagi ang DPOS ng 3,500 free safety helmets sa mga siklista.
Ani DPOS head Elmo San Diego ang tanggapan ay muling nakapagkaloob ng 200 free helmets noong Huwebes. Ang distribusyon ay magpapatuloy sa susunod na mga araw.
Sinabi ni San Diego na sa halip magpataw ng multa, ang DPOS ay mag-iisyu lang ng babala at magsagawa na muna ng pagpapakalat ng impormasyon hinggil sa ordinansa.(LP/PNA)