Matikas na ginatungan ni big man Vic Manuel ang Phienix Super LPG kontra sa kanyang dating kuwadrang Alaska para silaban ng Fuel Masters ang Aces tungo sa 101-93 win sa 46th PBA Philippine Cup, Sabado sa Ynares Sports Arena.
Binatak ni Manuel ang 26 points habang kumalawit nh 12 rebounds kung saan inisyal na sinagupa ang Aces sa unang pagkakataon buhat nang lumayas matapos ang Clark bubble at timunan ang kampo ng Phoenix na tuluyan namang nakaalpas sa dalawang beses na pagkatalo sa torneo.
"Masaya nakuha namin ang first win," sambit ng Muscle Man, na lumaro sa Alaska sa loob ng anim na seasons bago hiniling na magpa-trade pagkalipas ng 2020 season.
Pinunan ni Manuel ang absensya ni Matthew Wright na nagpapagaling sanhi ng ankle sprain.
"Sabi sa akin ni coach (Topex Robinson) hindi maglalaro si Matt so sabi niya, ikaw muna, kaya talagang kumpyansa ako, mataas kasi tiwala sa kin ni Coach Topex, ng coaching staff at mga teammates ko,"anang beteranong frontliner.
Ang puwersa ni Manuel ay inaniban nina nina RJ Jazul (17), Aljun Melecio (13), Jason Perkins (12) at Jake Pascual (10).
Naiwasan ng Fuel Masters na mabaon sa 0-3 win loss.
(Photo by:PBA.ph)
