NI NM Marlon Bernardino,
Pinangunahan ni National Master Darry Bernardo ang Philippine Chess team sa third place finish matapos magwagi ng marathon 79-move kontra kay Kumar A.Naveen sa kanilang Caro-Kann duel Sabado, Pebrero 4, 2023 sa FIDE Chess Olympiad for People with Disabilities na ginanap sa Belgrade's Crown Plaza Hotel sa Belgrade, Serbia.
Ipinamalas ni Bernardo ang kanyang husay sa pagkamada ng panalo sa fourth board para ihatid ang Filipinos sa 2-2 standoff kontra sa India sa sixth at final round tungo sa four way tie sa third place na may 8.0 match points, iskor na naitarak ng India (fourth), Serbia 1 (fifth) at Uzbekistan (sixth). Nailagay sila sa kani-kanilang puwesto matapos ipatupad ang tie-break points.
“Right now I don’t have anything on my mind. I am just happy. We will just continue doing what we are doing so far.” sambit ni Bernardo, na nagwagi ng individual gold medal sa fourth board na may undefeated record 5.5 points sa six outings na may account five wins at one draw.
Una dito ay natalo si Playing Coach National Master James Infiesto kontra kay Inani Darpan matapos ang 57 moves ng Bishop Opening sa Board 3.
Tabla naman sina Fide Master Sander Severino at Kutwal Shashikant matapos ang 37 moves ng Caro-Kann Defense sa Board 1 at tabla din sina National Master Henry Roger Lopez at Gangolli Kishan matapos ang 34 moves ng Queen's Gambit Declined sa Board 2.
"We do this for flag and country," ani Severino, na nagwagi ng individual silver medal sa top board after na may tangan na three wins at three draws.
Nitong 2020, ang Silay City, Negros Occidental Severino ay nakopo ang International Physically Disabled Chess Association (IPCA) World Online Chess Rapid Championship title.
"Thank God for this blessings. Individual Gold for NM Darry Bernardo; Individual Silver for FM Sander Severino and Bronze Medal for Team Philippines," sambit naman ni Playing Coach NM Infiesto.
Ang iba pang miyembro ng PH team ay sina NM Lopez at Atty. Cheyzer Crystal Mendoza.
Sa pagkapanalo ng Team Philippine ay napataas ang moral ng bansa ayon kay Rep. Prospero "Butch" Arreza Pichay Jr., chairman/ president ng National Chess Federation of the Philippines.
“Once again our flag has been raised in this foreign land after knowing that our Filipino kababayan finishes 3rd,” sabi ni Rep. Pichay.
Sa iba pang kaganapan ay umaasa ang top ranked Poland sa kanilang lower boards para talunin ang second ranked Israel, 3-1, tungo sa coveted title at gold medal tangan ang perfect 12.0 match points.
Giniba ni Pawel Piekielny si International Master Andrei Gurbanov matapos ang 28 moves ng Catalan Opening sa Board 3 habang winasiwas naman ni International Master Jacek Stachanczyk si Woman Fide Master Aleksandra Aleksandrova matapos ang 42 moves ng Philidors Defense sa Board 4.
Tabla naman si Grandmaster Marcin Tazbir kontra kay Grandmaster Yehuda Gruenfeld sa Board 1 at tabla din si Fide Master Marcin Molenda kay Fide Master Alexey Streltsov sa Board 2.
Bida din ang International Association of Chess with Physical Disability, ang tournament's seventh seed, i na nasa second place na may 10.0 match points bunga ng panalo sa No. 3 Hungary, 2.5-1.5.-Marlon Bernardino-