MANILA, Philippines---Pinatunayan lamang ni Grandmaster Rogelio “Banjo” Bacenilla Jr.na hindi siya mapipigilan sa top board matapos niyang pangunahan ang defending champion Laguna Heroes sa 16.5-4.5
victory kontra sa Cagayan Kings sa Professional Chess Association of the Philippines (PCAP) na tinampukang Grandmaster Wesley So Cup Miyerkoles, Mayo 19, 2021 sa online tournament sa chess.com.
Si Barcenilla na two-time (1989 and 1990) Asian Juniors champion sa India at Dubai at 1991 Bronze medalist sa World Juniors championship sa Romania ay nakamit ang bentaheng posisyon matapos ang magandang sakripisyo ng kanyang sa h7 check sa 39th moves para mapuwersa ang Uzbekistani chess Grandmaster Alexei Barsov na mag resign sa 42 pushes ng French defense sa kanilang rapid play encounter. Giniba din ni Barcenilla si Barsov sa 61 moves ng King's Indian defense sa blitz portion.
Ito din ang dahilan para matulungan nya ang Laguna Heroes ni team owner-playing coach Arena Grandmaster Dr. Alfredo “Fred” Paez na maka recover mula sa 1-2 Armageddon tie breaker setback sa Manila Indios Bravos nitong Sabado, Mayo 15.
“GM Banjo’s play was always razor-sharp, rational and brilliant.” sabi ni Arena Grandmaster Dr. Alfredo “Fred” Paez, isa sa pat na co-team owner ng Laguna Heroes na kinabibilangan din nina Mr. David Nithyananthan ng KALARO, Engr. Benjamin Dy ng SDC Global Choice at Engr. Jonathan Mamaril ng Oregon, USA.
Ginapi muna ng Heroes ang Isabela Knight Raiders, 17-4. Tangan ng Heroes ngayon ay ang 2-1 win-loss record sa Northern Division standings.
Kasama din sa nagwagi sa Laguna na suportado ng Greatech Philippines, Inc., SDC Global Choice, Jolly Smile Dental Clinic, KALARO at ng Rotary Club of Nuvali ay sina Fide Master Jose Efren Bagamasbad, Grandmaster John Paul Gomez, Vince Angelo Medina at Kimuel Aaron Lorenzo.
Winasiwas ni Bagamasbad si Lamber Arugay sa 45 moves ng Sicilian defense, dinurog ni Gomez si Jake Tumaliuan sa 34 moves ng Ruy Lopez Opening, pinadapa ni Medina si Robert Mania sa 42 moves ng Dutch defense habang nagwagi si Lorenzo kay Joan Furigay sa 36 moves ng Modern defense.
Sina Don Tyrone Delos Santos at April Joy Ramos ang nagtala ng kambal na panalo sa Cagayan maapos talunin sina Fide Master Austin Jacob Literatus at Woman National Master Jean Karen Enriquez, ayon sa pagkakasunod.
Panalo ang Laguna Heroes sa Cagayan Kings sa blitz portion, 6.5-0.5, maging sa rapid format, 10-4.
Samantala ay nakalasap ng magkasunod na pagkatalo ang Cavite Spartans kontra sa Manila Indios Bravos, 10-11, at Isabela Knight Raiders, 1-2, via Armageddon tie breaker. Ang Cavite ang naging tormentor ng Pasig Kings Pirates, 11-10, sa opening round. Subalit natalo naman ang Manila Indios Bravos sa Caloocan Loadmanna Knights, 6.5-14.5.-Marlon Bernardino-
Makikita sa larawang ito si Filipino Grandmaster Rogelio “Banjo” Bacenilla Jr.na pinatumba si Uzbekistani chess Grandmaster Alexei Barsov sa blitz portion at rapid play.